-- ADVERTISEMENT --

Gilauman sa mga konsumidor ang sunod-sunod nga pagkunhod sa presyo sa mga produktong petrolyo ug liquefied petroleum gas (LPG) sa sunod semana.

Mokabat sa P2 matag kilo ang pagkunhod sa presyo sa LPG nga magsugod karong umaabot nga adlawng Domingo Nobyembre 22.; kini nagpasabot nga adunay kinatibuk-ang pagkunhod nga P22 alang sa usa ka standard nga 11-kilogram nga tangke.

Mosunod niini ang pagkunhod sa presyo sa mga produktong lana sa sayong bahin sa sunod semana. Base sa trading sa Mean of Platts Singapore (MOPS), gibanabanang moubos ang presyo sa diesel og P2.67 matag litro, gasolina og P2.47 matag litro, ug kerosene og P1.88 matag litro.

Kining sunod-sunod nga pag-ubos sa presyo gipasabot nga tungod sa hinay nga panginahanglan inubanan sa lig-on nga suplay sa petrolyo sa merkado sa kalibutan.

Giklaro sa industriya sa lana nga kining mga numero alang sa mga produktong petrolyo mga pasiunang banabana lamang ug mahimo pang mausab, samtang naghulat pa sa opisyal nga pahibalo nga ipagawas sa Department of Energy (DOE).

-- ADVERTISEMENT --