Nag-abut ang mga nagkadaiyang grupo sa mga mamumuo sa buhatan sa Department of Labor and Employment-Central Visayas, aron sa pagpadangat sa ilang dugay na nga singgit ngadto sa Regional Tripartite Wages and Productivity Board-Central Visayas nga pagpataas sa suholan sa mga mamumuo.
Matud ni Dennis Derige, ang tigpamaba sa Partido Manggagawa, nga nagtapok ang mga grupo sa mga mamumuo sa buhatan sa DOLE aron ipanawagan ang paglangay-langay sa RTWPB-7 nga ipataas ang ilang ubos nga suholan ngadto sa makabuhing suholan.
Bout usab nga ipahinumdom sa grupo, nga adunay pending ang DOLE-7 nga obligasyon kabahin sa wage increase, lakip na usab ang pagpadayag sa panawagan ngadto sa publiko, sa pagpapas sa excise tax, value added tax, oil deregulation law ug pag-amyendar sa EPIRA law.
Gihimug-atan ni Derige, nga hinay ang lihok sa mga nagkadaiyang ahensiya sa kagamhanan kabahin sa pagtubag sa mga suliran sa mga mamumuo, kung itandi sa pagsaka sa mga nag-unang palaliton, diin usa sa mga malangan ang pagpasaka sa suholan sa mga mamumuo.
Dugang pa niini nga kinahanglang hatagan og pagtagad sa gobyerno ang paspas nga pagtubag alang sa mga mamumuo.
Sigon ni Derige, nga 90% sa mga sakop sa mamumuo nalubog na sa utang gumikan sa padayung nasinati nga krisis sa nasud hilabi na sa pagtaas nag-unang palaliton ug pagkunhod sa balur sa peso.
Hagit usab niini nga suwayan sa mga opisyal sa kagamhanan nga mokuha sa ilang minimum wage, aron mabati ang kalisod nga nasinati sa mga mamumuo.
