CENTRAL VISAYAS- Gipasiugda ni President Ferdinand “Bongbong” Marcos Jr. ang ₱42 nga dugang sa inadlaw nga minimum wage sa mga kwalipikadong trabahante sa pribadong sektor ug ₱500 nga pagtaas sa binulan nga suhol sa mga katabang sa Central Visayas atol sa ika-26 nga National Public Employment Service Office (PESO) Congress sa Lapu-Lapu City, Cebu.
Sa iyang pakigpulong, gipasiugda sa Presidente ang pagpalapad sa oportunidad sa trabaho ug pagpauswag sa kahanas sa mga mamumuo pinaagi sa pagpahiangay sa mga programa sa pagbansay sa aktuwal nga panginahanglan sa labor market.
Gimandoan usab niya ang DepEd, DOLE, DTI, CHED ug TESDA nga palig-onon ang ilang koordinasyon aron matubag ang panginahanglan sa mga industriya.
Lakip sa mga programa nga iyang gihisgotan ang Trabaho ng Daba, SkillPass ug Sagip Trabaho, nga nagtumong sa paghatag og temporaryong trabaho, skills training, sertipikasyon ug suporta sa mga trabahante ug negosyo.
Isip kabahin sa kalihokan, gipahigayon ang maritime job fair sa Island Central Mactan, diin kapin sa 1,300 ka bakanteng trabaho ang gitanyag, lakip ang 275 ka posisyon sa maritime sector.
Matod sa report sa Presidente, kapin sa 111,500 ka estudyante ug out-of-school youth ang nakabenepisyo sa Special Program for Employment of Students (SPES) sa unang unom ka bulan sa 2026, samtang dul-an sa 20,000 ka intern ang nakaapil sa Government Internship Program.
Gikan Enero hangtod Agosto 2026, nakapahigayon ang gobyerno og 1,554 ka job fair, diin kapin sa 65,534 ka indibidwal ang nadawat dayon sa trabaho.
Samtang kapin sa 14 milyong benepisyaryo ang natabangan pinaagi sa Tulong Panghanapbuhay sa Ating Disadvantaged/Displaced Workers (TUPAD) sukad sa pagsugod sa administrasyon hangtod Agosto 2026.
Gipasalig ni Marcos nga magpadayon ang kooperasyon sa gobyerno ug pribadong sektor aron mapalapad ang oportunidad sa trabaho, mapalig-on ang proteksiyon sa mga mamumuo, ug mahatagan ang mga Pilipino og desente ug malungtarong panginabuhi.
