Nanawagan si Senador Bam Aquino nga tangtangon ang Value-Added Tax (VAT) ug excise tax sa mga produktong petrolyo sa nasud.
Nagtuo ang magbabalaod nga nag-antos ang mga Pilipino tungod sa pagsaka sa presyo sa mga produktong petrolyo.
Subay niini, gisaway niya ang pamahayag ni Finance Secretary Frederick Go, kinsa nag-ingon nga ang mga adunahan lamang ang makabenepisyo kung tangtangon kini nga mga buhis sa gasolina o diesel.
Apan, gihimug-atan ni Sen. Bam nga mas lapad nga sektor ang makabenepisyo gikan sa pagtangtang niini nga mga buhis sa mga produktong petrolyo.
Espesipiko niyang gihisgutan ang liboan ka mga drayber ug operator sa mga jeepney, taxi, ug uban pang pampublikong sakyanan nga nagsalig sa gasolina o krudo alang sa ilang panginabuhian.
Busa, nangatarungan siya nga ang gobyerno angay nga mogamit sa gahom nga gihatag sa Kongreso, nga nagtugot sa pagsuspinso sa pagkolekta sa excise tax sa lana.
