Subling nanawagan si Navotas City Rep. Toby Tiangco alang sa dinaliang pagsuspinde o pagpakunhod sa excise tax sa mga produktong petrolyo.
Nahitabo kini nunot sa padayon ug bag-ong hugna sa dakong pagsaka sa presyo sa lana, nga usa ka tinubdan sa reklamo ilabi na alang sa mga drayber ug mga mamumuong Pilipino.
Matod ni Tiangco, mahimong ipatuman ang pagsuspinde sa excise tax tungod kay ang Republic Act No. 12316 naghatag sa gobyerno og awtoridad sa pagbuhat niini, o bisan sa pagpakunhod sa buhis.
Sukad niadtong Septiyembre 22, ang presyo sa diesel misaka og P8.82 matag litro, gasolina og P4.88, ug kerosene og P6.47.
Ang kinatibuk-ang pagsaka sa presyo sulod lang sa milabay nga tulo ka semana miabot na sa P18.31 matag litro alang sa diesel, P15.25 alang sa gasolina, ug P16.67 alang sa kerosene.
Tungod niini, nagtuo ang magbabalaod nga ang kasamtangang sitwasyon usa ka lig-on nga rason aron mangandam ang gobyerno sa pagsuspinde o pagpakunhod sa excise tax nga gipatuman sa mga produktong petrolyo.
Nagtuo siya nga usa lamang kini ka temporaryo nga sakripisyo apan makahatag og dinaliang kahupayan ngadto sa publiko.
