Gipasidunggan atol sa recognition ceremony sa Camp Aguinaldo ang 89 ka miyembro sa Philippine contingent nga gipadala sa Myanmar niadtong Abril, human sa kusog nga 7.7-magnitude nga linog sa nahisgutang nasud.
Ang pagpasidungog gihimo kagahapon, Hulyo 4, 2025, diin ang Philippine Inter-Agency Humanitarian Contingent gilangkuban sa mga personahe gikan sa nagkalain-laing ahensya sa gobyerno.
Ang pag-ila naglakip sa 21 ka personnel sa Armed Forces of the Philippines, 10 sa Bureau of Fire Protection, 10 sa Metro Manila Development Authority, 14 sa Department of Environment and Natural Resources, 31 sa Department of Health ug 3 sa Office of the Civil Defense, diin kini sila, nitabang sa search and rescue operations sa Myanmar.
Sa mensahe ni OCD officer-in-charge ASec. Bernardo Rafaelito Alejandro IV nagkanayon nga ang suporta sa mga ahensya sa gobyerno nagpakita sa dili matarug nga panaghiusa dili lamang sa mga komunidad sa nasud kon dili lakip na sa mga silingang nasud sa panahon sa panginahanglan.
Siya miingon nga kini usab nagpalawom sa inter-agency nga kooperasyon, panaghiusa, ug kahusayan, nga mahinungdanon sa pagtubag sa dagkong mga katalagman sa nasud ug sa gawas sa nasud. |Bombo Irene Ardiente
