CENTRAL VISAYAS- Nitaho ang Commission on Elections-Central Visayas (Comelec-7) nga nagpabiling malinawon ang rehiyon sa wala pa ang panahon sa lokal nga kampanya, diin 97 porsiyento sa mga lugar niini ubos sa green category, nga nagpakita nga walay kabalaka sa seguridad kalabot sa eleksyon.
Kini ang gipahibalo ni Comelec-7 Regional Director Francisco Pobe, sa pakighinabi sa Bombo Radyo Cebu, diin iyang giklaro nga magpadayon ug matapos karong semanaha ang ilang pagbansay-bansay sa mga magtutudlo, gisundan sa pagbansay-bansay sa mga sakop sa board of canvassers karong Abril.
Gidugang niini nga karong adlawa, Marso 21, 2025, magpahigayon usab sila og ‘unity walk’ sa Plaza Independencia aron ang tanan mahimong responsable sa pag-uswag ug pagkab-ot sa kalampusan sa umaabot nga eleksyon.
Sa laing bahin, si Pobe miingon nga ang sitwasyon sa kalinaw ug kahapsay gibantayan pag-ayo gamit ang color-coded classification system base sa historical election incidents ug potential threats.
Matod ni Pobe, kadaghanan sa mga lugar sa Central Visayas nagpabilin sa green category, nga nagpakita nga walay kabalaka sa seguridad kalabot sa piniliay.
Bisan pa, ang pipila ka mga lugar ubos sa mas taas nga klasipikasyon sa seguridad base sa makasaysayanong kapintasan sa eleksyon, nagpadayon nga imbestigasyon, ug ang posibleng epekto sa umaabot nga opisyal nga panahon sa kampanya sa kalinaw ug kahusay.
Sa Bohol, ang Baclayon, Buenavista, Candijay, Pilar, ug Ubay anaa sa yellow nga kategorya, nga nagpakita sa kasaysayan sa mga insidente nga may kalambigitan sa eleksyon, samtang ang Bilar ug San Miguel anaa sa orange nga kategorya tungod sa seryoso nga mga armadong hulga.
Sa Cebu, ang dakbayan sa Lapu-Lapu gibutang ubos sa yellow category, ingon man ang mga lungsod sa Sibonga ug San Fernando.
Samtang nagpabiling malinawon ang Central Visayas, si Pobe niinsister nga kinahanglang magpabiling mabinantayon ang mga awtoridad.
