CEBU CITY- Gireklamo pinaagi sa Bombo Panawagan sa Bombo Radyo Cebu ang kabahin sa kahimtang sa suba sa Guadalupe pabor sa Barangay Pahina Central ning dakbayan sa Sugbo, tungod sa giingong nadam-ok na nga mga basura sa maong suba.
Sa mensaheng gipadangat ni alyas “Maria” sa sibyaanan sa Bombo, gisaysay niini nga sa higayong adunay mangagi sa gamayng dalan sa maong dapit (likurang bahin sa Barangay Hall padulong sa merkado sa Taboan), masaksihan nila ang gatipun-og nga mga basura.
Busa, gironda sa Bombo Radyo Cebu News Team ang maong dapit apan lisud tuyoon ang gitumbok nga lugar tungod kay sa dalan Sanciangko, adunay kasamtangang gitrabaho nga taytayan sa maong dapit, busa dili luwas doulan samtang gi-obra kini sa mga construction workers.
Apan sa pagway hunong nga sukit-sukit sa maong dapit, gisuta diha dapit sa highway sa N. Bacalso Avenue, unahan gamay sa Cebu City Medical Center, nisugat ang reklamo sa gatipun-og nga basura sa maong suba nga nakapabalaka sa mga residente sa maong dapit.
Atol sa atong pagkuha sa buhing hulagway sa maong suba, nahinabi sa Bombo Radyo Cebu team ang usa ka residente sa maong dapit nga si Tope Cimafranca, ug iyang gisaysay nga naproblema sila sa basura ilabi ilabi na sa higayon musaka ang tubig sa suba kung adunay mga kusog nga pag-uwan.
Asoy pa ni Cimafranca, adunay dakong bahin gayud sa basura ang dli gikan nila nga mga residente sa maong dapit, ug gibanlas lang kini sa tubig-baha gikan sa babawng bahin sa suba.
Lain kabalaka nga gidapit ni Cimafranca ang ilaha usab nga sugilanon sa delikadong kaagian ilabi na sa kagamay niini sa higayon magsugatay ang mga tawo nga mangagi.
Gitino niini nga aduna nagyud daw higayon sa mga nakalabay nga mga bata mahagbong niini nga bahin sa dalan, pero dili gihapon malimbong ang ilang kahadlok ilabi na kung motungtong na ang kagabhion gumikan kay lisud subayon ang saktong tahas sa maong dalan.
Sa pagkakaron, sugyot sa mga residente sa maong dapit nga matagad sa ilang barangay ang ilang sugilanon ilabi na nga naglambigit kini og kaluwasan sa publiko ug kahimtang sa kinaiyahan.
