Gihimakak sa Philippine National Police (PNP) ang mga taho nga nakalingkawas gikan sa ilang kustodiya si kanhi Bureau of Corrections (BuCor) chief Gerald Bantag, nga giisip nga pugante tungod sa mga kasong giatubang niini.
Matod ni Police Colonel Allen Rae Co, hepe sa PNP Public Information Office, ang mga pulis sa Ifugao nagpatuman lamang og beripikasyon kalabot sa usa ka impormasyon nga nag-ingong nakit-an si Bantag sa maong lugar.
Apan, human sa gihimong pagsusi, gikumpirma sa kapulisan nga wala didto si Bantag.
Gipasabot ni Co nga nagpakita kini sa padayong paningkamot ug determinasyon sa kapulisan sa pagpatuman sa mga warrant of arrest batok sa mga wanted nga indibidwal, walay pagpili kung kinsa ang ilang gipangita.
Una nang mikaylap ang mga taho nga nakit-an kuno si Bantag sa usa ka poultry farm ug nakalingkawas human miabot ang mga operatiba sa kapulisan.
Apan, gipatin-aw sa PNP nga walay nahitabong pagdakop o pag-ikyas sa maong operasyon.
Gipasalig usab ni Co nga nagpadayon ang pagpangita kang Bantag aron matuman ang mga mando sa korte batok kaniya.
Kahinumdoman nga niadtong Abril 2023, nagpagawas ang Muntinlupa Regional Trial Court og warrant of arrest batok kang Bantag kalabot sa kaso sa pagpatay sa brodkaster nga si Percival “Percy Lapid” Mabasa.
