Giklaro sa Philippine National Police (PNP) nga wala nila gilambigit sa politika ang pagkasakmit sa gatusan ka kilo nga ilegal nga droga sa Laos nga gituyo unta nga ipasulod sa Pilipinas.
Gipanghimakak ni PCol. Allen Rae Co, hepe sa PNP Public Information Office, ang mga taho nga misulay sa paghatag og politikal nga kolor sa maong isyu.
Gipasiugda ni Co nga gihimo sa kapulisan ang imbestigasyon subay sa hustong proseso sa balaod ug pinaagi sa hugot nga pagsusi sa tanang impormasyon nga anaa kanila.
Giila na usab sa mga imbestigador ang mga suspek nga giingong nalambigit sa pagsulay sa pagpalusot sa maong mga ilegal nga droga ngadto sa nasud.
Kahinumdoman nga gibutyag na ni Interior Secretary Jonvic Remulla ang mga pagkatawo sa mga suspek nga nalambigit sa maong kaso.
