CEBU CITY-Patay ang 15 anyos nga mahuyang human kini giloglog sa li-og sa iyang kaugalingon nga uyuan sa Sitio Tambis , Brgy. Inuburan dakbayan sa Naga,Cebu pasado alas 7:00 sa kagabii.
Giila ang biktima nga si John Mich Sepriano. Samtang ang uyuan niini mao si Arnel Sabanal,46 anyos.
Matud ni SPO1 Gen Cabrera ang Desk Officer sa Naga City Police Station nga sa wala pa nahitabo ang incidente giingong nag-away ang biktima ug ang iyang ig-agaw nga anak sa suspek. Human sa maong panag-away mi-uli ang biktima sa ila apan gisundan diay kini sa suspek nga nagbitbit og sundang. Kalit nga gigunitan sa suspek ang biktima ug gigulgol ang liog niini.
Dugang pa ni SPO1 Cabrera nga hapit maputol na ang li-og sa biktima.
Sa karon padayon pa nga gipangita sa mga otoridad ang suspek nga uyuan sa biktima nga daling naka-ikyas sa maong lugar human gihimo ang nahisgutang krimen.
