Gipaubos sa asynchronous classes ang pito ka mga eskwelahan sa Lapu-Lapu City isip pagpangandam sa umaabot nga Defense Ministers Summit nga ipahigayon sa Mactan Expo Center.
Matod ni Lapu-Lapu City Schools Division Assistant Superintendent Dr. Ronald Y. Ferrer, ang maong mga eskwelahan anaa sa mga ruta nga agianan sa mga convoy padulong ug gikan sa venue, sugod sa airport hangtod sa mga hotel.
Lakip sa mga eskwelahan nga naapektuhan mao ang IBO Elementary School, Buaya Elementary School, Mactan Elementary School, Soong Elementary School, Mactan National High School ug Senior High School, ug Punta Engaño Elementary School ug National High School.
Gipatuman ang maong pamaagi sulod sa usa ka semana, sugod niadtong Lunes, Oktobre 26, 2026 hangtod na sa Biyernes, Oktobre 30, 2026 subay sa direktiba sa lokal nga kagamhanan ug sa Department of Education o DepEd.
Gipasabot ni Ferrer nga wala gihunong ang pagkat-on sa mga estudyante tungod kay gihatagan sila og mga buluhaton ug leksyon nga ilang buhaton samtang adunay padayong paggiya ug pag-follow-up gikan sa ilang mga magtutudlo.
Gipaniguro usab sa DepEd nga dili mabiyaan ang mga estudyante sa ilang pagtuon ug dili maapektuhan ang school calendar sa kasamtangang school year.
Samtang, ang ubang mga eskwelahan sa siyudad, magpadayon sa naandan nilang face-to-face classes.
