CEBU CITY – Gihimug-atan ni Dr. Rene Josef Bullecer, International Human Life Advocate, nga wala pa hingpit nga nakuha sa Pilipinas ang ti-unay nga kagawasan.
Kini ang iyahang pamahayag subay sa paghandum ika-31 nga anibersaryo sa EDSA People Power Revolution.
Matud ni Dr. Bullecer nga nagapos sa gihapon ang Pilipinas sa mga kamot sa dagkong nasud.
Dugang pa nga hangtud karun dili pa economically dependent ang nasud diin giingong dagko pa kini og utang ug nagkinahanglan pa kini og dugang kalamboan sa ubang mga aspeto.
Giasoy usab ni Bullecer nga kung hisgotan ang politika giingong walay kagawasan ug walay kausaban gumikan kay anaa sa gihapon ang mga traditional politicians, political dynasty ug giingong wala sa gihapon makab-ot ang political maturity sa mga politiko.
Sigon pa nga walay dakong kausaban nga nahitabo sa Pilipinas human ang nahisgutang rebolusyon gawas lang sa pagdaghan sa populasyon ug mga kriminalidad.
Subay niini, iyahang giawhag ang mga ginikanan, magtutudlo ug kapari-an sa pag-ambit sa ilahang mga nasayran lakip na ang importansya sa nahitabong rebolusyon ngadto sa mga bag-ong henerasyon karun ug sa umaabot.
