CEBU CITY – Gituohan ni Cebu 4th District Congressman Benhur Salimbangon nga dili magmalampuson ang giduso nga impeachment complaint ni Magdalo Partylist Rep. Gary Alejano batok kang Presidente Rodrigo Duterte.
Sa pakighinabi sa Bombo Radyo kang Rep. Salimbangon, matud pa nga susamang usa ka ‘numbers game’ ang mahitabo kung diin nasayud man ang tanan nga anaa sa Kongreso ang super majority.
Matud pa sa Kongresista nga walay basihan arun nga matangtang sa pwesto si Presidente Duterte.
Gitataw usab niini nga dili siya pabor sa giingong impeachment gumikan kay nakita niini ang seryoso nga kampanya sa presidente batok sa iligal nga drogas.
Giingong gikinahanglan karun sa presidente ang suporta sa kampanya niini batok sa iligal nga drogas.
Gihulagway ni Salimbangon nga hilabihan nga makadaut sa nasud ang drogas hinungdan nga angayan lang kini nga pakigbatokan pinaagi sa pagsuporta sa presidente.
