CEBU CITY – Andam nga muhatag og 300,000 ang pamilya ni David Chua Lim, Jr. alang sa kinsa man ang makahatag og kumpleto nga kopya sa video sa nahitabong road rage incident.
Sa usa ka press conference, gihimug-atan ni Atty Orlando Salatandre, ang abogado ni Lim nga andam muhatag ang ilahang kampo og reward money arun nga mugawas na ang ti-unay nga nahitabo.
Matud pa sa abogado nga andam usab si nga mu-withdraw sa kaso kung mapamatud-an nga walay nahitabong komosyon una nahitabo ang pagpamusil sa iyahang kliyente.
Gituohan sa kampong Lim nga putol ang video nga mikatap sa social media ug wala gipagawas ang kinatibuk-ang footage.
Kahinumdoman nga gibarugan ni Atty Salatandre nga self-defense ang gibuhat sa iyahang kliyente human nga adunay nahitabong komosyon tali sa biktima ug nakita niini nga adunay kauban si Nuñal hinungdan nga nagpaboto kini sa iyahang armas.
Samtang subling gihimug-atan ni Cebu City Police Chief Sr/Supt Joel Doria nga walay nahitabong special treatment ngadto kang David Chua Lim, Jr.
Gipasabot ni Doria nga rason nganong adunay duha ka miyembro sa Special Action Force nga nagbantay ni Lim gumikan sa hulga sa seguridad niini human nga mikatap sa social media ang video sa road rage incident.//
Giklaro usab niini nga nakasibilyan ug walay dalang armas ang duha ka pulis nga nagbantay sa biktima nga si Ephraim Nuñal gumikan kay giingong protocol kini sa tambalanan nga dili mamahimong magdala og armas sa sulod.
Apan iyahang gibutyag nga aduna may mobile patrol nga nagbantay gawas sa tambalanan hayan luwas lang sa gihapon ang biktima.
