Nag-deploy ang Kagamhanang Probinsyal sa Sugbo og mga bus aron maghatag og libreng sakay sa Cebu South Bus Terminal ug Cebu North Bus Terminal alang sa mga senior citizen, mga PWDs, mga solo parent, mga mabdos, ug mga ginikanan nga nagbiyahe uban ang gagmay nga mga bata alang sa Kalag-Kalag 2026.
Ang maong inisyatiba nagtumong sa pagtabang sa mga prayoridad nga pasahero nga mopauli sa ilang mga dapit sa dili pa ang pagsaulog sa Kalag-Kalag.
Naghatag usab ang Probinsya sa Sugbo og tubig nga mainiom sa nagkalain-laing bahin sa terminal. Ingon man karong adlawa, Biyernes, magbutang usab og “mobile kitchen” ang Provincial Disaster Risk Reduction and Management Office aron mag-apod-apod og libreng pagkaon ngadto sa mga pasahero.
Aron masiguro nga adunay medikal nga tabang, matod ni Dr. Sheila Faciol, ang pangu sa Cebu Provincial Health Office magbutang og mga medical station sa terminal sugod karong adlawa hangtod sa Nobyembre 2. Kini nga mga station maghatag og mga serbisyong panglawas ug dinaliang medikal nga tabang alang sa mga pasahero.
Aron maatiman ang gilaumang pagdagsang sa mga biyahero, nagbutang ang administrasyon sa terminal og lugar nga pa-huwatan sa gawas, nga adunay igong mga lingkoranan ug mga electric fan, aron mahimong mas komportable ang palibot alang sa mga pasahero ilabi na sa mga oras nga pinakabusy ang biyahe.
Gisusi usab ni Acting Governor Caminero ug sa uban pang mga opisyal sa probinsya ang mga pasilidad ug mga lakang sa seguridad sa terminal. Naglakip kini sa mga pampublikong kasilyas, sistema sa bentilasyon, mga CCTV camera, mga protocol sa seguridad, ug mga counter alang sa mga nawala ug nakit-an nga mga butang (lost-and-found), aron masiguro ang kaluwasan sa mga pasahero ug sa ilang mga kabtangan.
