Walay hunong sa pagdumala ang mga sakop sa Cebu City Transportation Office o CCTO sa nagkadaiyang sementeryo ug kadalanan sa dakbayan sa Sugbo, atol sa katapusang adlaw sa Kalag-Kalag 2026, Lunes sa hapon, Nobyembre 2.
Taliwala sa grabeng kainit sa panahon ug kalit-kalit nga pag-uwan, milahutay gihapon ang mga personnel sa CCTO sa pagpaniguro nga hapsay ang dagan sa trapiko ug malikayan ang paghuot sa mga kadalanan, ilabina sa mga dapit nga duol sa mga sam-ang.
Sukad sa ilang gipahigayong send-off ceremony niadtong Oktubre 24, 2026, mi-deploy ang CCTO og mokabat sa 536 ka personnel aron motabang sa pagdumala sa trapiko atol sa natapos nang 48th ASEAN Summit ug sa pagsaulog sa Kalag-Kalag pinaagi sa Oplan Kalag-Kalag 2026.
Kahinumduman nga sukad sa pagsugod sa maong deployment, full force ang mga sakop sa buhatan ug wala na makatagamtam og ilang regular nga leave ug day-off tungod sa ilang padayong suporta sa nagkalain-laing kalihokan sa dakbayan.
Matud pa ni Arce, usas ilahang dakong problema sa kadalanan mao kining mga dispatcher nga magpataka og pa-parking sa mga motor sa mga dapit nga adunay No Parking Zone, lakip na sa mga lugar nga gitagana lamang alang sa mga emergency vehicle.
Gihulagway niini, nga dakong kasamok ang maong paglapas, dili lamang alang sa ilang mga personnel kon dili alang usab sa ubang motorista nga mahimong ma-ticketan o makarga gud ang ilang mga motor tungod sa illegal parking.
Gipasabot usab niya nga ang mga lakang nga gihimo sa CCTO dili aron sa pagsamok-samok sa publiko, ko dili alang sa kaayohan sa kadaghanan ug aron masiguro ang kahapsay ug kaluwasan sa kadalanan.
Human usab sa halos napulo ka adlaw nga walay hunong nga deployment, magpadayon gihapon ang ilang regular nga katungdanan sa pagmintinar sa kahapsay sa trapiko sa dakbayan sa Sugbo.
