Nangandam ang kagamhanan sa Dakbayan sa Sugbo og alternatibong tinubdan sa tubig isip pagpangandam sa posibleng epekto sa grabeng huwaw o Super El Niño.
Nakig-alayon na usab ang siyudad sa Metropolitan Cebu Water District (MCWD) diin nagbutang og siphon machine sa Barangay Paril ug Barangay Bonbon aron adunay sa igo nga tinubdan sa tubig panahon sa tingnihit.
Matud ni Kenneth Siasar, chief of staff ni Mayor Nestor Archival nga naghimo og lagoon sa sapa diin ibutang ang makina nga motabang sa pagproseso sa tubig aron mahimo kining mainom.
Target nga mahimong operational ang duha ka siphon machine sa Disyembre 10, 2026.
Sa higayon nga operational na ang duha ka pasilidad, maghimo ang siyudad og kalihokan diin imbitahon ang mga sakop sa media aron makita ug mahibaw-an sa publiko ang mga alternatibong tinubdan sa tubig.
Gilaoman nga makatabang kini ilabina sa mga bukirang barangay nga posibleng labing maapektohan sa kakuwang sa suplay sa tubig panahon sa huwaw.











