PROVINCE OF BOHOL- Opisyal na nga gibutang ubos sa State of Calamity ang tibuok probinsya sa Bohol tungod sa grabeng epekto sa El Niño nga nakaapekto sa sektor sa agrikultura ug liboan ka mag-uuma.
Kini human giaprobahan sa Sangguniang Panlalawigan ang deklarasyon niadtong Nobyembre 17, subay sa rekomendasyon sa Provincial Disaster Risk Reduction and Management Council (PDRRMC).
Base sa datos, mikabat na sa P372,791,988.79 ang kinatibuk-ang kadaot sa agrikultura sa probinsya tungod sa hulaw nga dala sa El Niño.
Mikabat na usab sa 18,384 ka mag-uuma ang naapektuhan, samtang 36 sa kinatibuk-ang 48 ka lungsod ug siyudad sa Bohol ang nakasumite na og report kalabot sa kadaot sa ilang mga pananom.
Lakip sa grabeng naapektuhan ang mga humayan, samtang gibanabana nga mokabat sa P6.5 milyon ang kadaot sa mga tanom nga mais ug P5.3 milyon sa mga high-value crops.
Una na nga nipagawas og pamahayag si Bohol Governor Erico Aris Aumentado, nga gilaoman nga makatabang ang deklarasyon sa pagpadali sa pagpagawas sa calamity funds ug paghatag og pinansyal nga ayuda sa mga mag-uuma nga nawad-an og panginabuhian tungod sa pagkadaot sa ilang mga pananom.
Samtang, nagpadayon ang probinsyal nga panggamhanan sa pagpalig-on sa mga lakang aron masiguro ang suplay sa tubig sa mga komunidad ug umahan, lakip ang pag-andam sa mga water pump ug solar-powered water systems.
Gipaabot usab nga magpadayon ang pagmonitor sa kadaot sa agrikultura tungod kay posibleng modugang pa ang ihap sa mga apektadong mag-uuma samtang nagpadayon ang uga nga panahon.











