Hapsay ug malinawon na ang kahimtang sa Cebu South Bus Terminal sa dakbayan sa Sugbo karong Dominggo, Nobyembre 1, 2026, human sa pagdagsa sa liboan ka pasahero sa miaging mga adlaw tungod sa pagsaulog sa Kalag-Kalag.
Gibaha sa mga biyahero ilabina kagahapong adlawa, Oktubre 31, diin liboan ka mga pasahero ang naglinya ug nagdali sa pagsakay sa mga bus aron makauli sa ilang tagsa-tagsa ka lungsod ug siyudad sa habagatang bahin sa lalawigan sa Sugbo.
Mahinumduman nga niadtong Oktubre 30 ug 31, namatikdan ang dakong gidaghanon sa mga pasahero sulod sa terminal, ilabina sa mga oras sa alas 7:30 hangtod alas 8:30 sa gabii, diin daghan ang nagpaabot sa ilang biyahe aron makauban ang ilang pamilya sa paghinumdom sa ilang mga minahal nga namatay.
Apan karong adlawa, mikunhod na ang gidaghanon sa mga pasahero ug mibalik na sa malinawon ug hapsay nga kahimtang ang maong terminal.
Gibutyag niya nga sa ilang ruta nga Cebu paingon sa lungsod sa Oslob, kasagaran kausa lamang sila mobiyahe, apan tungod sa pagsaka sa gidaghanon sa mga pasahero, napugos silang modugang sa ilang biyahe aron maserbisyohan ang mga biyahero.
Samtang sa pagkakaron, ang mga pasaherong makita nga naglinya sa terminal mao na lamang ang mga wala makabiyahe kagahapong adlawa ug karon pa mopadayon sa ilang pagpauli.
Gilauman usab ni Jansen nga human sa pagsaulog sa Undas, mosaka na usab ang gidaghanon sa mga pasahero nga gikan sa nagkadaiyang lungsod ug munisipalidad sa probinsya padulong sa dakbayan sa Sugbo aron mobalik sa ilang trabaho ug uban pang mga kalihokan.
Sa kataposan niyang mensahe, giawhag niya ang publiko nga kanunayng mag-amping sa ilang mga biyahe, ilabina sa umaabot nga Nobyembre 3 nga gilauman nga mubalik na pag-usab ang mga pasahero dinhi sa Dakbayan sa Sugbo.
