Naka-code white alert status na ang buhatan sa Department of Health pinaagi sa pagpalig-on sa medical preparedness sa Central Visayas alang sa gilauman nga pagdaghan sa mga tawo sa mga sementeryo panahon sa Kalag-kalag.
Gipailalom sa *Code White Alert* ang mga government health facilities, lakip ang mga emergency room, gikan sa Oktubre 31 hangtod Nobiyembre 3, diin naka-standby ang mga health worker alang sa posibleng pagtaas sa ihap sa mga pasyente.
Apan dili lamang medical emergencies tungod sa kadaghan sa tawo ang gikabalak-an sa DOH-7.
Gipasidan-an usab ang publiko batok sa heat-related illnesses, ilabina tungod sa nagpadayon nga El Niño ug sa posibilidad nga magdugay ang mga tawo sa mga sementeryo nga limitado ang landong.
Matod ni Dr. Shelbay Blanco sa Regional Health Emergency Management Services sa DOH-7, gitambagan ang mga mobisita sa sementeryo nga magdala og igo nga tubig, magsul-ob og komportableng sinina ug magdala og kalo o payong aron maprotektahan ang kaugalingon batok sa kainit.
Girekomendar usab nga likayan ang dugay nga pag-expose sa adlaw, ilabina sa pinakainit nga mga oras, ug mopasilong sa lugar nga adunay landong kung gikinahanglan.
Partikular usab nga gipahimangnoan ang mga adunay hypertension, diabetes ug uban pang dugay nang sakit nga ipadayon ang ilang maintenance medicines ug likayan ang sobra nga kainit ug pagdasok sa mga tawo.
Gikumpirmar usab sa Cebu Provincial Health Office nga magbutang kini og medical personnel sa Cebu North Bus Terminal ug Cebu South Bus Terminal. Ingon man nga mag-deploy og mga personnel ang Bohol Provincial Health Office sa mga strategic areas, samtang ang Mandaue City nagporma og mga team nga gilangkuban sa medical personnel ug Barangay Health Emergency Response Teams.
Subay niini, gipahinumdoman usab ang publiko sa pag-amping sa ilang kan-on ug imnon, ilabina ang paglikay sa dili luwas nga tubig ug pagkaon nga mahimong hinungdan sa kalibanga ug uban pang sakit sa tiyan ug tinai. via Bombo Rocky Lavarez
