Samtang nagkadool ang pagsaulog sa Kalag-Kalag, nagkadaghan usab ang mga pamilya nga nangandam sa pagbisita sa mga sementeryo ug paghalad og mga kandila alang sa ilang mga minahal nga namatay na.
Tungod niini, usa sa mga produkto nga kusog pangitaon karong panahona mao ang kandila, nga nagsimbolo sa pag-ampo, paglaom ug paghinumdom sa mga kalag sa atong mga minahal.
Sa lungsod sa Minglanilla, lalawigan sa Sugbo, usa ka candle factory ang nagpadayon sa ilang produksyon aron matubag ang nagkadaghang order sa mga mamalitay.
Sa pagbisita Bombo Radyo Cebu News Team sa maong pabrika, personal nga nasaksihan ang nagkadaiyang proseso sa paghimo sa kandila, gikan sa pag-andam sa mga materyales hangtod sa paghulma niini aron mahimong andam na sa pagbaligya.
Matud ni Cleofe Larumbe, anak sa tag-iya sa maong pabrika, 43 na ka tuig ang ilang negosyo nga gisugdan pa sa ilang amahan.
Dako usab kini nga panahon alang sa ilang negosyo tungod kay misaka ang demand ug nagkadaghan ang mga order sa kandila ilabina karong Kalag-Kalag.
Apan bisan sa ordinaryong mga adlaw, aduna gihapon silay mga suki nga kanunayng mopalit sa ilang mga produkto.
Nagdepende sa mga order sa ilang mga suki ang gidaghanon sa ilang produksyon kada adlaw. Lain-lain usab nga klase ug gidak-on sa kandila ang ilang gihimo, subay sa panginahanglan sa mga mamalitay.
Sa laing bahin, ilang gibutyag nga mokabat sa usa ka libo sa kandila ang ilang mahimo matag-adlaw, mas barato usab kini kung direkta nga mamalit sa factory kung itandi sa mga tindahan
Ang kandila nga kasagarang makita sa gawas nga tag-singko pesos matag buok, tag-piso lamang diay kini matag usa kon direkta nga paliton sa maong pabrika.
Dako usab kini nga tabang sa mga tindera nga mamalit og daghang stocks aron ibaligya pag-usab sa merkado.
Matud pa sa atong mga nakaistoryang tindera og kandila sa Carbon Public Market, dinhi mismo sa Minglanilla ang ilang kasagarang kumprahanan tungod kay ania dinhi ang mga pabrika nga ilang kuhaan sa paninda.
