Gipasakaan ug kasong pagpangawat ang usa ka 40 anyos nga byudong lalaki nga gikatahong usa ka notadong kawatan human kini madakpan niadtong nakalabayng semana, Nobyembre 6 2026 tungod kay nasakpan kini sa akto nga nanguha og mahalon nga wallet nga adunay sulod nga kwarta sulod sa Minglanilla Sports Complex, Poblacion Ward I, Lungsod Minglanilla.
Ang suspek naila nga si Gapor Liwalog, 40 anyos, byudo, ug residente sa Brgy. San Roque, Dakbayan sa Talisay.
Nadakpan si Liwalog human kini nga gialarmahan sa mga concerned citizens sulod sa Minglanilla Sports Complex kay ila kining nakit-ang pasimpleng mikuha sa pitaka nga gipanag-iya sa biktima nga si alias “Marycris”, 39 anyos, nga nag-atiman sa iyang bata atol sa maong panghitabo.
Human mabantayi, daling midagan ang maong suspetsado apan nagukdan kini sa mga concerned citizens ug gikuptan hangtod nga miabot ang mirespondeng kapulisan sa Minglanilla Municipal Police Station sa pagpangulo ni PLTCOL Maria Theresa Macatangay.
Atol sa body search, nakuha sa posesyon sa suspetsado ang usa ka Michael Kors nga pitaka nga gipanag-iya sa biktima ug adunay sulod nga P5,450.00, ug uban pang mga gamit nga gikawat sab sa suspek gikan sa laing lugar sama sa 5 ka mga mobile phones, 3 ka mga headsets, 1 ka charger cord, 1 ka airtag keychain, ug usa ka gray bag.
Matud pa ni PLTCOL Maria Theresa Macatangay, Acting Chief sa PNP Minglanilla, modus sa maong suspek nga mobiktima sa mga maggamit sa pasilidad sa Sports Complex sa mga nagkalain-laing lugar sa habagatang Sugbo og maniid sa mga nahibilin nga bags aron manguha og mga gamit sama sa cellphones ug kwarta.
Nasayran sab nga mobiktima sab kini ug mga menor de edad diin magpakarung-ingnon kini nga amahan sa mga biktima ug mokuha sa bag nga gibilin sa gwardiya aron makuha ang ilang mga gadgets ug kwarta.
Gi-awhag ni Macatangay ang tanang mga nawad-an og gamit ug na-biktima sa maong suspek nga mopasaka og kaso aron mapalig-on ang kasong Theft ug dili na makapanguha pa ug mga gamit.
Dugang pa, mipahimangno usab si Macatangay nga magbinantayon sa mga gamit hilabi na sa pampublikong lugar aron makalikay sa mga pagpangawat hilabi na panahon sa pasko karon.
