Nasikop ang 21-anyos nga si Jayson Bentulan, residente sa Barangay Nangka, lungsod sa Consolacion, human giingong gikawat niini ang mga alahas ug kuwarta sa social media personality Ronnie Suan o mas naila nga “Boy Tapang” sa iyang rest house sa lungsod sa Alcoy, Probinsya sa Sugbo.
Matud pa ni Boy Tapang pinaagi sa facebook live niini, tulo ka bulan na ang milabay sukad sa pagduol kaniya ni Bentulan aron mangayo og tabang tungod sa kalisod sa kinabuhi ug sa tinguha nga makapadayon sa pag-eskwela.
Tungod niini, iyang gikuha si Bentulan aron motabang sa pag-atiman sa iyang mga kahayopan ug gisuportahan ang pag-eskwela niinI, gawas sa gastohon sa pagtuon, hatagan usab niya kini og allowance nga tag 5,000 pesos matag semana.
Apan, niadtong Nobyembre 2, Lunes, samtang wala si Boy Tapang sa maong resthouse ug didto sa iyang panimalay dinhang nahitabo ang pagpangawat.
Sumala kang PMAJ Jose Nilo Abello, hepe sa Alcoy Police Station, padung na unta mouli ang caretaker sa maong resthouse sa dihang nakabantay kini nga napalong ang suga, sa wala pa kini mobiya, gisiguro unta sa caretaker nga nakasiga ang mga suga, hinungdan nga natingala kini sa pagkapalong niini.
Pagpasiga niya pag-usab, nakabantay kini nga adunay tawo nga naglatay-latay sa ibabaw nga bahin sa maong lugar, ug tungod kay wala niya maklaro ang nawong sa maong tawo, iyang gipahibalo dayon si Boy Tapang kabahin sa iyang nakita.
Sa sinugdan, nagtuo pa si Boy Tapang nga gibinuangan lamang siya sa caretaker, busa iyang gipadala ang pipila sa iyang mga tawo aron susihon ang sitwasyon, apan, pagkakumpirma sa iyang mga tawo nga tinuod ang pagpangawat, miadto usab siya sa lugar aron tan-awon ang nahitabo.
Didto na nadiskobrehan nga nawala ang iyang mga alahas nga nagkantidad og 600,000 pesos ug kuwarta nga mokabat sa kapin 40,000 pesos.
Dugang pa ni PMAJ Abello, si Boy Tapang mismo ug ang iyang mga tawo ang unang nakadakop sa suspek pasado alas 6:00 sa kagabhion, ug Narekober gikan sa bulsa sa suspek ang mga gikawat nga alahas ug 10 mil pesos na lamang nga kuwarta.
