Nadakpan sa kapulisan ang usa ka lalaki nga giingong nangawat og motorsiklo sa R. Palma Street, Cebu City niadtong Oktubre 12, human kini mailhan pinaagi sa CCTV footage.
Giila ang suspek nga si John Michael Sumalinog, 30 anyos, adunay kapuyo ug residente sa Barangay Lahug, Cebu City. Gibilanggo na kini sa Waterfront Police Station.
Matud ni PCapt. Raymart Rabanes, OIC sa Police Station 3 o Waterfront Police Station, gilusad sa ilang grupo ang backtracking operation human madawat ang report sa pagpangawat.
Pinaagi sa pagsubay sa CCTV footage, nasubay ang lihok sa suspek hangtod sa iyang pagkadakop.
Atol sa pagrekisa kang Sumalinog sa police station, narekober gikan kaniya ang duha ka pakete sa gituohang shabu.
Gidudahang nalambigit usab siya sa ubang pagpangawat og motorsiklo sa dakbayan.
Gidudahan usab sa kapulisan nga adunay kauban si Sumalinog, nga giila sa alyas nga “Alcantara,” nga giingong nagbaligya online sa mga kinawat nga motorsiklo, kinsa nadakpan usab sa Talisay City niadtong Oktubre 12.
Ang gikawat nga dark blue nga Honda Click nga adunay plakang L430DC gitanyag sa suspek ngadto sa iyang higala, apan wala pa mahuman ang pagbaligya sa dihang nadakpan siya.
Atubangon ni Sumalinog ang kasong carnapping ug paglapas sa Section 11, Article II sa Republic Act 9165 o Comprehensive Dangerous Drugs Act of 2002. via Bombo Jemm Mayot
