-- ADVERTISEMENT --

Giklaro ni Cebu Governor Pamela Baricuatro nga ang gisugyot nga limitasyon sa pagpasulod og baboy gikan sa Negros Oriental nagtumong sa pagpanalipod sa lokal nga mga magbababoy samtang gisiguro ang igong supply sa lechon-size nga baboy karong Pasko ug Sinulog.

Sa iyang pamahayag, gibutyag ni Baricuatro nga ang gisugyot nga 1,500 ka baboy matag semana gikan sa Negros Oriental maoy labing taas nga limit, nga mas ubos itandi sa kapin 2,500 ka baboy nga mosulod matag semana karon.

Ubos kini sa hugot nga biosecurity measures batok sa African Swine Fever (ASF).

Aron makasugakod ang mga lokal nga backyard hog raisers, gimandoan sa gobernador ang iyang agriculture consultant nga si Gigi Sanchez nga organisahon sila ngadto sa mga asosasyon aron matabangan sa pagbaligya, diin misaad na ang CP Farms nga mopalit sa ilang mga baboy.

Gisugyot usab sa Kapitolyo ang parehas nga presyo nga ₱180 matag kilo alang sa mga baboy nga ubos sa 40 kilos sa Cebu man o gikan sa Negros Oriental aron malikayan ang unfair competition.

-- ADVERTISEMENT --

Magpagawas ang Kapitolyo og Executive Order aron pormal nga ipatuman ang maong polisiya ug ang mga silot sa makalapas niini.