CEBU CITY- Gipahugtan sa Cebu City Department of Veterinary Medicine and Fisheries (DVMF) ang border control sa Barangay Toong ug Barangay Sapangdaku aron mapugngan ang pagkaylap sa African Swine Fever (ASF).
Kini human makumpirma ang positibong kaso sa ASF sa Barangay Toong.
Sumala kang Dr. Jessica Maribajoc, hepe sa DVMF-Cebu City, padayon ang surveillance sa apektadong lugar, lakip ang sulod ug gawas sa 500-meter radius.
Gipasabot ni Maribajoc sa Bombo Newsteam nga ang mga baboy nga ibalhin kinahanglan moagi sa hustong pagsusi ug makakompleto sa gikinahanglang mga dokumento.
Ang mga baboy nga negatibo sa ASF mahimong hatagan og sertipikasyon subay sa mga regulasyon.
Giawhag usab ang mga magbababoy nga mokooperar sa mga awtoridad aron mapugngan ang pagkaylap sa sakit ngadto sa ubang mga barangay.
Samtang, wala pa’y dakong epekto sa suplay sa karne sa baboy sa Cebu Province bisan pa sa padayon nga pagmonitor sa African Swine Fever (ASF).
Sumala kang Maribajoc, padayon ang pagmonitor aron masiguro ang kaluwasan ug igo nga suplay sa mga produktong baboy sa merkado.
Gipasiugda gihapon ang hugot nga pagpatuman sa mga lakang batok sa ASF, ilabi na sa pagdumala ug pagbalhin sa mga baboy gikan sa usa ka lugar ngadto sa lain.
Gipahinumdoman sa DVMF ang mga magbababoy nga hugot nga ipatuman ang biosecurity measures sa ilang mga babuyan aron malikayan ang pagkaylap sa African Swine Fever (ASF).
Giawhag sila nga sundon ang hustong pag-atiman sa mga baboy ug ang mga lakang aron mapugngan ang pagsulod ug pagkaylap sa sakit.
Gipasiugda usab ang pagsunod sa mga panudlo sa veterinary authorities aron mapanalipdan ang panginabuhian sa mga magbababoy ug malikayan ang dugang nga pagkalugi.
