Sikop sa Inayawan Police Station ang usa ka 18-anyos nga batan-on human nadakpan tungod sa pagpangawat og mga alahas sulod sa usa ka panimalay sa Jaca Compound, Barangay Inayawan, dakbayan sa Sugbo, pasado alas 4:00 sa kaadlawon niadtong Biyernes, Oktubre 30, 2026.
Giila ang suspek nga si alias “Renz”, 18 anyos, walay trabaho ug lumad nga taga Probinsya sa Negros Oriental apan temporaryong nanimuyo sa Inayawan.
Base sa report, nahitabo ang insidente pasado alas 3:00 sa kaadlawon dihang nakadungog ang biktima og kusog nga kasaba sa likod nga bahin sa ilang balay. Sa dihang iyang gisusi, iyang nakit-an ang suspek nga nagtinguha pagbungkag sa kandado sa pultahan nga puthaw ug nakakuha na sa mga alahas sulod sa ilang balay.
Misulay pa og ikyas ang suspek apan nasakpan kini human gigukod sa biktima ug sa ubang sakop sa pamilya ug natanggong sulod sa compound. Gipangayo dayon ang tabang sa barangay ug gihimo ang citizen’s arrest sa mga Barangay Peacekeeping Action Team.
Narekober gikan sa suspek ang tulo ka pirasong alahas nga nagkantidad og kinatibuk-ang P155,000.
Lakip niini ang usa ka gold watch nga nagkantidad og P35,000, usa ka 18-karat gold ring nga adunay diamante nga nagkantidad og P40,000 ug usa ka 18-karat gold bracelet nga nagkantidad og P80,000.
Sa habig sa dinakpan hugot niining gihimakak ang pasangil bisan og nakita siya sa CCTV ang giingong pagpangawat niini.
