Usa ka 77-anyos nga babaye ang nakit-ang patay sulod sa usa ka septic tank sa usa ka subdivision sa Barangay Tungkil, Minglanilla.
Giila ang biktima sa iyang mga paryente ug anak nga babaye nga si Glenda Petallana Angel, 77, usa ka residente sa Barangay Tungkil, Minglanilla.
Nadiskubrehan sa usa ka residente sa subdivision ang lawas sa babaye nga naglutaw sa septic tank human niya namatikdan nga nahugno ang semento nga tabon niini. Sa pagsusi sa tangke, nakurat ang residente nga nakakita og lawas nga naglutaw sa sulod.
Dali nga nagpakitabang ang saksi ug gitaho ang insidente, hinungdan nga miresponde ang mga awtoridad gikan sa Minglanilla Municipal Police Station.
Sigon ni Police Lt. Col. Maria Theresa Macatangay, hepe sa Minglanilla Municipal Police Station, miingon nga ang biktima nailhan dayon sa iyang mga anak.
Matud niini, ang biktima adunay sakit nga Alzheimer ug gikataho nga nawala gikan sa iyang panimalay pasado alas 3 sa kaadlawon niadtong Lunes, Agosto 3, 2026 ug katapusan siyang nakita sa mga residente nga naglakaw sa Barangay Tungkil mga pasado alas 4 sa kaadlawon.
Gibutyag sa mga awtoridad nga wala silay nakitang mga timailhan sa foul play ug gituhoang ang biktima posibleng nadakin-as ug aksidente nga nahulog sa septic tank.
Gisusi sa mga awtoridad ang closed-circuit television (CCTV) footage sa lugar aron mahibal-an ang mga sirkumstansya sa insidente.
Giproseso na sa mga personahe gikan sa Scene of the Crime Operatives (SOCO) ang lawas sa biktima, samtang padayung naghulat ang mga kapulisan sa resulta sa autopsy.
