Cebu City-Gipahinumduman ni kanhi Senador ug amahan sa Local government code, Aquilino Nene Pimentel Jr ang mga magbabalaod sa kung unsay nakalatid sa batakang balaod sa Pilipinas. Matud ni Pimentel nga gikinahanglan na nga magpahoigayon og joint session ang senado og kongreso aron hisgutan og madesisyunan ang deklarasyon ni Presidente Rodrigo Duterte nga pagpaubos sa Martial Law sa tibuok Mindanao subay na sa kagubot karon sa Marawi City.
Matud pa ni Pimentel nga ang klaro og tataw nga gimando sa batakang balaod nga gikinahanglan nga mag usa ang kongreso ug senado sa paghimo og desisyon human sa deklarasyon sa Presidente. Gihimug-atan usab ni Pimentel nga ang kamandua-an ang nasulat mismo sa 1987 Constitution ug dili kini gi -imbento ni bisag kinsa lang.
Dugang pa ni Pimentel nga dili mahimo nga mapadaplin ang katungud sa katawhan tungud sa deklarasyon sa Presidente hilabi na og ang Pilipinas usa ka Demokratiko nga nasud.
Samtang giisip lamang sa majority block sa Kongreso nga usa ka ordinaryo nga panghitabo ang pagdeklarar ni Presidente Rodrigo Duterte og Martial Law sa Mindanao maong wala nila gihimong prayoridad ang pagpahigayon og joint session.
Kini maoy gibutyag ni Magdalo Representative Gary Alejano human nga gibarugan gayud sa majority nga mag joint session lamang kon e revoke ang deklarasyon sa Presidente. Gihimug-atan ni Alejano nga mahibalu-an lamang kung angayan gayud nga e revoke o dili ang maong deklarasyon kon kini ang mahisgutan sa joint session nga mao usab ang nakalatid sa batakang balaod sa Pilipinas.
Matud pa niini nga mas maayo kung mahibaw-an samtang sayo pa kung duna bay igong basehan ang deklarasyon sa Martial Law sa tibuok Mindanao o angayan ba nga kini ang limitahan lamang.
Gibutyag usab ni Alejano nga dili igo ang sulat nga gipadala sa Presidente sanglit aduna pa silay mga pangutana nga angayang matubag sa Presidente og sa mga representate niini.
