Update
Cebu City-Gitumbok ni Police Regional Office 7 Director Police Chief Supt. Noli Taliño nga mga protektor sa mga durugista ang 3 ka mga opisyal nga nadakpan sa lungsod sa San Fernando Cebu.
Matud ni Taliño nga base sa ilang imbestigasyon nga migawas nga sila si ABC President Jhony Aresgado, Konsehal Edwin Villaber ug Konsehal Alfonso Donairre IV ang giingong makignegosyar sa mga otoridad bugti sa kagawasan sa mga drug personality ngha madakpan sa ilang lugar. Matud pa ni Taliño nga ang mga armas ug shabu nga nakuha sa 3 ang mas nakapalig-on pa sa imbestigasyon sa kapulisan kalabot sa ilang kalambigitan sa pagpahuyot sa ginadiling drogas. Gibutyag usab niini nga anaa sa watchlist sa kapulisan ang tulo ug taud taud na usab kini nilang gipanid-an. Suma pa niini nga mga narco politicians ang tulo . Kasong my kalambigitan sa paghupot sa armas nga walay lisensya kon RA 10591 ug paghupot sa illegal nga drogas kon RA 9165 ang nakatakdang ipasaka batok tulo ka mga dinakpan.
Samtang gitino ni Cebu Association of Barangay Captain President Celestino Matinez III nga dili nila labanan ang ilang sakop nga nakalapas sa balaod hilabi na ang mga nalambigit sa iligal nga drogas. Kini human usab sa sunud sunud nga dakop sa kapulisan sa mga kapitan dinhi sa probinsya sa Sugbo.
Matud ni Martinez nga wala gikonsinti sa ABC ang maong dautang binuhatan sa ilahang sakop. Matud pa niini nga subu palandungon nga ang katong mga angayang mahimong maayo nga ehemplo sa ilang mga sakop, mao naman hinuon ang nalambigit sa mga iligal nga kalihukan. Gitino usab niini nga dili sila mupugong sa otoridad sa pagbuhat sa ilang tahas nga pagsikop sa mga tawo nga nakalapas sa balaod bisan pa man ug ilaha kining sakop.
Hinuon gisugyot niini ang mga kapulisan nga mamahimong patas sa ilang imbestigasyon hilabi na og nagkaduol na ang baranggay election. Gibutyag niini nga importante nga maampingon ang mga otoridad sa ilang imbestigasyon kay basin adunay bulok pulitika ang magpaluyo sa mga report nga ilang nadawat.
