CEBU CITY – Problema sa kwarta ang gilantaw nga motibo hinungdan nga napatay sa kanhi pulis ang iyahang asawa ug duha ka anak nga pulos mga menor de edad.
Giila ang suspek nga si PO2 Joel Lopez, 36 anyos samtang ang asawa niini ang giila nga si Jelyn Lopez, 36 anyos.
Sa pakighinabi sa Bombo Radyo ni C/Insp Jose Liddawa, ang City Police Commander, gibutyag niini nga alas 5 sa kaadlawon kagahapon sa mismong panimalay suspek sa Villadolid, dakbayan sa Carcar, adunay wala pagkasinabtanay ang magti-ayon gumikan sa kwarta ug miresulta kini sa mainiton nga panaglalis.
Matud ni C/Insp Liddawa nga nadungog na lang sa mga silingan ang upat nga boto sa armas nga gikan sa panimalay sa suspek.
Giingong nadungog sa inahan ni Jelyn nga si Clementina Lapiña ang pagpangayo og tabang sa 8 anyos nga apo niini.
Misugat sa ilahang mga mata ang nagbuy-od ug nagkadugo nga lawas sa mga biktima lakip na ang suspetsado.
Dugang pa ni Liddawa nga human nga gipusil ni Lopez ang iyahang pamilya giingong gipusil usab niini ang iyahang kaugalingon diin gipaboto niini ang armas sulod sa iyahang baba.
Nakuha sa kapulisan sa crime scene ang M16 nga adunay unom ka mga bala nga gituohang gigamit sa suspel sa naasoy nga krimen.
Sa pagkakarun, padayon ang imbestigasyon sa kapulisan sa nahitabong krimen ilabi na kung diin ang suspek sa maong armas nga wala naman kini sa serbisyo.
Nasayran nga na-dismiss sa serbisyo si Lopez gumikan sa kasong administratiba.
Samtang, daghan usab ang wala makatuo nga nabuhat sa kanhi pulis ang maong krimen gumikan kay giingong hilumon kini nga tawo kinsang dili mutingog kung dili unhan og istorya.
