CEBU CITY-Gitambagan ni Archbishop-Emeritus Oscar Cruz si House Speaker Pantaleon Alvarez nga dili apilon ang laing tao ilabina ang mag-ti-ayon sa personal niya nga katuyu-an.
Kini tungod sa pagduso ni Alvarez sa bill kung diin makapawala sa bisa sa kasal o dissolution of marriage. Matud ni Cruz nga kung naay problema si Alvarez sa iyang pamilya dili angayan nga apilon ang publiko.
Giingon sa Archbishop nga maka-uuwaw nga himoong solusyon ang pagduso na lang og bill nga pwede nga magbuwag ang magti-ayon kung dili na kini malipayon sa ilang kaminyoon.
Gihimug-atan ni Archbishop nga pareho lang nga giguba niini ang iyang pangalan ug dungog lakip na ang ilang mga anak. Tambag ni Cruz nga mas maayong mukonsulta kini sa usa ka marriage councelor para matagaan og solusyon ang iyang problema. Sigon niya nga away gani sa nasud adunay pay reconciliation unsa pa kaha kung kaminyoon na ang hisgutan.
Gipadayag usab ni Cruz ang iyang habig kalabot sa maong bill, matud niya nga mas maayo nga dili nalang magpakasal kung magbuwag ra sa ulahi.
Gihimug-atan usab niya nga kung ang gihuna-huna sa mga opisyal nga misuporta niini mao ang gasto sa proseso sa pagbuwag mas maayo nga huna-hunaon nila ang gasto sa pagpakasal.
Dugang pa ni Cruz nga mas maayo nga ilang tutukan ang pagpreserbar sa pamilya ug dili ang pag-guba niini.
