CEBU CITY- Aksidente ug walay intention sa pagpatay ang nahitabo sa senior citizen kinsang naligsan sa usa ka utility vehicle sa PDRMMO kagahapon sa buntag didto sa may Cebu South Coastal Road, San Roque, Talisay.
Mao kini ang paghulagway sa imbestigador nga si PO2 Amilito Jornales subay na usab sa nahitabo sa tiguwang nga si Rodrigo Sumubay, 67 anyos ug residente sa maong dapit.
Basi sa imbestigasyon giingong mulabay unta sa basura ang tiguwang sa dagat ug wala nabantayan sa utility vehicle nga gimaneho ni Nicolas Matugas, 48 anyos ang pagtabok niini mao nga nabundulan kini.
Hinoon, gitino ni Baltazar Tribunalo Jr. ang head sa PDRMMO nga mireport na dayon sila sa gobernador kabahin niini ug ilang gi-abaga ang gasto. Gitataw usab ni Tribunalo nga ang sakyanan nga gimaneho sa PDRMMO staff, adunay gisundan nga sakyanan nga kusog ang padaganan ug mikalit lang kini og hinay hayan wala niya mabantayi kay kalit nga milabang ang tiguwang.
Gidala pa sa tambalanan ang maong tiguwang apan milabay ang pipila ka oras nakabsan kini sa iyang kinabuhi. Gipahimutang na ang patay nga lawas sa biktima sa pinuy-anan niini.
