Cebu City- Padayon nga gisuta sa kapulisan sa Police Station 3 sa Cebu City Police Office ang alegasyon sa usa ka inahan nga matud pa gidagit ang iyahang anak nga kapin usa ka semana pa lamang nga gihimugso.
Una niini , nagpakitabang sa Waterfront Police Station si Irene Capuno, ang inahan sa masuso nga giingong gidala ni Chera Jean Quezon kinsang kauban ra usab niya nga nanglaag sa dakbayan sa Sugbo kagahapon sa buntag. Sa eskslusibo nga pakighinabi sa Bombo Radyo Cebu ni Capuno, gibutyag niini gihagad siya ni Quezon nga manglaag sa Dakbayan sa Sugbo diin matud pa nga gilibrehan kini sa suspek.
Pagkahuman, mibisita usab sila sa Basilica Minore del Santo Niño aron managkot .Saysday pa ni Capuno nga kaihi-on kaayo siya maong miboluntaryo usab si Quezon nga gunitan usa niini ang masuso aron nga makasud kini sa pansayan.
Hilabihang kakurat na lamang matud pa ni Capuno nga sa dihang paggawas niya sa pansayan, wala na niini makita ang iyahang anak ug ang iyahang kauban nga si Quezon.
Giangkon usab ni Capuno nga wala kaayo siya nakaila ni Quezon sanglit nagkaila ra sila sa boardwalk sa dakbayan sa Danao diin sila nagpuyo samtang nag abang matud pa sa dakbayan sa Lapulapu ang suspek.
