Gipadayag sa Metropolitan Cebu Water District (MCWD) ang ilang hugot nga pagpangandam aron masiguro ang igong suplay sa tubig sa Metro Cebu sa posibleng epekto sa El Niño.
Matod ni Atty. John DX Lapid, General Manager sa MCWD, sukad pa niadtong Abril, nakadawat na sila og regular nga binulan nga mga briefing gikan sa PAGASA aron masusi ang kahimtang sa panahon ug makahimo sa angay nga mga lakang.
Diin nagtukod ug nagpadagan ang MCWD og mga booster station sa nagkalain-laing lugar aron mapadayon ang presyur ug dagan sa tubig. Ingon man nakig-alayon ang MCWD sa mga bulk supplier alang sa desalinated water o tubig gikan sa dagat aron madugangan ang suplay, bisan pa man og kini medyo mahal.
Gipaambit usab niini nga adunay mga gihimong lakang ug pagpalit aron mapalapad ang suplay sa tubig gikan sa Carmen ug malikayan ang epekto sa kakulang sa ulan. Dugang pa ni Atty. Lapid, kung mograbe ang El Niño ug mahimong talagsaon ang kakulang sa ulan gikan sa Nobyembre hangtod sa unang bulan sa sunod tuig, nagtinguha ang buhatan nga makakuha og bag-o ug mas dakong gidaghanon sa tubig karong Nobyembre aron masiguro ang padayon nga serbisyo sa publiko.
Samtang, nangandam na usab ang dakbayan sa Mandaue alang sa epekto sa hulaw ug nalatid na ang mga detalyadong plano aron sulbaron ang krisis o kakuwang sa tubig sa siyudad.
Matod ni Atty. Sally Malig-on, ang City Administrator sa Mandaue, ang opisina sa Mayor ug ang City Admin nagpadala og suwat ngadto sa mga barangay ug mga pangu sa departamento niadtong ikaduhang kwarter aron mangayo og mga sugyot ug lakang.
Diin kini nga mga sugyot gihugpong ug gihimong pormal nga plano nga gi-apruba atol sa tigom sa Disaster Risk Reduction and Management (DRRM) Council sa ikaduhang quarter.
Nagplano usab ang siyudad nga mogamit sa CDRRM fund sa sunod tuig aron pondohan ang gikinahanglang mga ekipo ug proyekto alang sa paghatag og luwas nga tubig sa tibuok Mandaue.
