Nigawas sa usa ka pagtuon nga ang grabeng kainit o taas nga lebel sa heat index angay nang ilhon isip usa ka global health emergency, sumala sa usa ka pagtuon nga gipatik sa usa ka medical research journal.
Gipasiugda sa maong panukiduki ang nagkadakong hulga nga gipahinabo sa grabeng kainit sa panglawas sa tawo, ilabina tungod sa nagpadayong epekto sa climate change o pagbag-o sa klima sa kalibotan.
Ang pagtuon nga naglangkob sa mga datos gikan sa 2016 hangtod sa kasamtangang panahon nagpakita sa seryosong epekto sa pagtaas sa temperatura sa kalibotan, nga nagbutang sa daghang tawo sa peligro sa mga sakit nga may kalabotan sa kainit.
Sumala sa World Health Organization (WHO), ang climate change usa sa dagkong hulga sa panglawas sa publiko sa tibuok kalibotan.
Lakip sa mga labing delikadong epekto niini ang heat-related illnesses, dehydration ug heatstroke, ilabina sa mga lugar nga kanunay makasinati og grabeng temperatura sama sa Pilipinas.
Samtang, padayon nga nagpagawas og mga pahimangno ang Philippine Atmospheric, Geophysical and Astronomical Services Administration (PAGASA) mahitungod sa lebel sa heat index sa nagkalain-laing bahin sa nasud.
Tungod niini, gitambagan ang publiko nga mag-amping batok sa epekto sa grabeng kainit pinaagi sa kanunay nga pag-inom og tubig, paggamit og sunblock ug paglikay sa dugay nga pagbabad sa adlaw, ilabina tali sa alas 10:00 sa buntag ug alas 4:00 sa hapon.
