CEBU CITY-Padayon pa ang imbestigasyon karon sa kapulisan sa Mandaue PS sa nahitabong pagpamomba sa motor shop nga gipanag-iya ni Peter Lim kinsa giila nga druglord dinhi sa dakbayan.
Matod pa ni PSI Hugo Ipong ang hepe sa Subangdako PS nga takna alas-2:15 sa buntag kaganinang kadlawn nakadawat sila ug tawag gikan sa security guard sa Hilton Motors kabahin sa pagpamomba sa maong shop.
Sa inisyal nga imbestigasyon, nakadungog ug duha nga kusog nga buto ang guard on duty sa nahisgutang shop.
Nigawas usab sa imbestigasyon nga improvised explosive device ang hinungdan sa pagpabuto.
Sa pakighinabi sa kapulisan sa gwardiya nasayran nga nakadungog ug duha ka buto ang gwardya sa maong pagpamomba.
Giawhag ni Ipong sa mga nakakita sa maong insedente nga makipag-alayon dayon sa kapulisan para mapadali ang imbestigasyon.
Mahinomdoman nga niadtong milabay nga semana gisuwayan usab sa pagsunog ang bar nga gipanag-iya lang gihapon ni Peter Lim.
