Gipaniguro sa Police Regional Office 7 o PRO-7 nga dili ra maapektuhan ang pag-deploy sa mga kapulisan alang sa seguridad sa umaabot nga paghandum sa Kalag-Kalag ug sa ASEAN Defense Ministers’ Meeting, bisan pa man nga nagkadungan ang pagpangandam alang sa duha ka dagkong kalihokan.
Kini subay sa pagpaabot sa kadaghanan sa mga molupyo ug bisita sa Central Visayas nga masiguro ang ilang kaluwasan atol sa pagbisita sa mga sam-ang ug sa pagpahigayon sa internasyonal nga kalihokan.
Matod ni PLTCOL Rolan L. Aliser, spokesperson sa PRO-7, giandam na daan sa kapulisan ang ilang deployment aron masiguro nga adunay igong personnel nga motubag sa panginahanglan sa seguridad sa duha ka kalihokan.
Matod pa ni Aliser, aduna silay bulag nga deployment sa mga kapulisan alang sa ASEAN Defense Ministers’ Meeting ug alang sa Kalag-Kalag.
Gawas niini, ang pipila ka police station naghatag usab og augmentation force o dugang nga personnel nga makatabang sa deployment alang sa ASEAN meeting.
Gipasabot ni Aliser nga usa sa mga hagit sa kapulisan ang pagdumala sa duha ka dagkong kalihokan nga hapit magdungan, ilabi na kay nagkinahanglan usab og igong personnel ang ubang rehiyon alang sa ilang tagsa-tagsa ka deployment.
Tungod niini, ilang gipalapad ang paggamit sa kasamtangang personnel aron matubag ang mga panginahanglan sa seguridad nga dili magsakripisyo sa kaluwasan sa publiko.
Dugang pa sa spokesperson, gikanselar na usab ang tanang naaprubahan o gipangayo nga leave sa mga kapulisan sugod niadtong miaging adlaw isip kabahin sa ilang pagpangandam.
Nagpasabot kini nga gipahimutang sa full alert status ang kapulisan, diin gipaninguhaang maseguro ang hingpit nga pagtambong sa mga personnel alang sa ilang katungdanan.
Bisan pa sa kakulang sa dugang nga personnel nga mahimong makuha gikan sa ubang rehiyon, mipasalig ang PRO-7 nga ilang gamiton sa labing epektibong paagi ang anaa nilang pwersa aron mapanalipdan ang mga lumulupyo sa Central Visayas ug ang mga bisitang moapil sa ASEAN Defense Ministers’ Meeting.
Gipasalig sa kapulisan nga magpadayon ang ilang pagpangandam aron masiguro ang malinawon ug luwas nga pag-obserbar sa Kalag-Kalag, samtang naghatag usab og igong seguridad sa internasyonal nga kalihokan.
