CEBU CITY-Strikto ug hugot nga seguridad ang gipatuman sa usa ka hotel sa Jerusalem, Israel diin nakighimamat ang libuan ka mga overseas Filipino workers kon OFWs ni Pres. Rodrigo Duterte pag-abot sa maong nasud alang sa official visit.
Kini ang nasinati sa usa ka OFW nga taga-Tel Aviv, sa naasoy nga nasud, nga si Jen Peñaflor, diin usa siya sa kapin usa ka libo nga OFWs nga napilian gikan sa Philippine Embassy to Israel pagtambong sa maong event.
Sa pagpakighinabi sa Bombo Radyo Cebu kang ni Peñaflor, gibutyag niini nga sa 5-star hotel gipahigayon ang panagkita ni Duterte ngadto sa mga OFWs.
Nasayran pa nga dunay panagbangi ang Jewish tali sa mga Arab maong strikto ang mga lakang sa seguridad ug sa pagpangandam atol sa pagbisita ni Duterte kauban ang iyang mga delegado gikan sa nagkalain-laing mga departmento sa nasud. Usa ka oras ang biyahe ni Peñaflor gikan sa Tel Aviv ngadto sa Jerusalem hayan sakto lang matud pa ang kahago niya gikan sa pag-apply sa Embassy online.
Samtang, misaysay pa usab kini sa kultura sa giisip nga “holy land”. Giingong niini nga sa iyang na-obserbahan ang kalahian sa kultura sa 2 ka nasud diin naay “extended family” ang Pilipinas samtang kinahanglan nga mobiya sa poder sa ginikanan inig abot na sa 18 anyos ang usa anak didto sa Israel.
Nakita usab sa maong OFW nga compulsory alang sa Israel ang pag-attend sa military training.
