CEBU – Mi-surrender na sa iyahang pamilya ang gitudlo nga main suspek sa pagpatay sa 62 anyos nga negosyante sa Brgy. Tabunok, dakbayan sa Talisay.
Kini maoy gikumpirma ni P/Supt Marlo Conag, ang hepe sa Talisay City Police Station.
Matud ni Conag nga nakadawat sila ug impormasyon kabahin sa pag-surrender ni Johnny Banilad sa iyahang pamilya sa ilang lugar. Nagtago tago matud pa kini sa kalasangan human masayri nga nasikop ang iyahang duha ka igsuon ug gipangita na usab kini sa kapulisan.
Matud pa nga nagtinabangay na ang Badian Police Station ug ang Talisay City Police Station aron masikop ang suspek.
Nasayran nga kagahapong adlawa, nanawagan sa Bombo Radyo sila si Jay-R ug Jeffrey ngadto ni Johnny aron nga malimpyo ang ilahang pangalan.
Gibutyag usab ni Conag nga hapit na ma resolba ang kaso gumikan sa pagka sikop ni Johnny.
Samtang, gihimakak ni Johny Banilad, ang iyahang kalambigitan sa pagpataya ni Victoria Po Loa, kinsa nga biktima nga gisulod sa refrigerator.
Gisumbalik ni Johny ang pasangil ngadto sa iyahang igsuon nga si Jay-R Banilad ug matud pa mao gayud kini ang mibuhat sa krimen.
Dugay na matud pa nga giplano ni Jay-r ang pagpatay sa iyahang amo sanglit una na kini nga gidudahan nga maoy mangawat ug gamit niini. Mao usab matud pa kini ang rason nganong wala na kini pabalika sa pagtrabaho sa biktima.
Gihimakak usab niini nga duna kini palano nga mu-ikyas sanglit wala man kini siya’y labot sa krimen.
