Cebu City- Dili mahagbungan og dagom ang Osmena Blvd. sa kadaghan sa misalmot sa prusisyon sa gipahigayon nga walk with Jesus kaganihang kaadlawon isip pag-abli sa Fiesta Senor 2019. Gikan sa Guadalupe church giprusisyon ang imahe ni Senyor Santo Niño padulong sa Basilica ,Minore Del Santo Niño.
Matud ni Police Senior Inspector Jomar Pomarejos, nga gibana-banang dili muubos sa 300,000 ang ihap sa tao nga misalmot sa prusisyon ug sa una nga misa sa naasoy nga selebrasyon. Karong adlawa usab ang sugod sa 9 ka araw nga novena sa mga nagpanata kang Senyor Santo Niño.
Samtang, hugot nga seguridad ang ipatuman sa Basilica tungod na usab sa kabaga sa tao nga musulod-gawas sa naasoy nga simbahan. Gitambagan usab ang mga deboto ug ang mga mubisita sa simbahan nga likayan ang pagselfie inay kuhaan na lang ug hulagway ang Senyor Santo Niño.
Una na nga giingon sa Sinulog Foundation Inc. (SFI) nga naa sa 80 percent sila nga andam para sa engrande nga Festival sa Cebu.
Gi-atangan usab ang mamahimong performances sa Sinulog Grand Parade kung diin usa sa mga gikahinaman mao ang performance sa guest contingent nga gikan sa South Korea.
