CEBU CITY – Anaa na sa luwas nga kahimtang ang 5 ka miyembro sa pamilya nga gitoohang nahilo tungod sa pagkaon og butete sa Brgy. Song-on Pangan-an isla sa Olanggo dakbayan sa Lapu-lapu,Cebu.
Gibalhin ang mga biktima nga sila Miles, 10 anyos, Gian 12 anyos, Derick,9 anyos, Shantol 5 anyos, ug Maria Theresa Casiao 3 anyos sa Vicente Sotto Memorial Medical Center (VSMMC) sa dakbayan sa Sugbo para mamonitor ang ilang kahimtang.
Samtang nakabsan gyud sa kinabuhi ang 5 anyos nga si Mateo Casiao sa ilang panimalay human kini nalipong ang nagsuka-suka.
Una niini, matud sa Brgy, Kapitan sa naasoy nga lugar nga si Kapitan Oto Casiao nga nanguha og isda ang iyang mga pag-umangkon para sud-anon.
Wala matud pa niini nabantayan nga dunay nasagol nga butete sa ilang kuha ug nalakip pa kini sa ilang giluto nga tinola.
Sa dihang nahuman na pagpangaon ang pamilya, nakasinati na matud pa kini og pagsakit sa tiyan ug pagkalipong.Apan ang 5 anyos nga si Mateo ang wala na swertehe sanglit diha-diha dayon kini namatay.
Samtang, gitan-aw karon sa mga doktor sa VSMMC ang posibilidad nga dili lang tungod sa butete ang hinungdan sa pagkahilo sa mga biktima.
