Mas lig-on nga pagpangandam ug mas epektibong pagresponde sa mga katalagman ang gipasalig ni Cebu City Mayor Nestor Archival ngadto sa mga Sugboanon, usa ka tuig human sa pag-igo sa Bagyong Tino sa Sugbo niadtong Nobyembre 4, 2025.
Matud ni Archival, nahimong dakong leksyon sa city government ang mga kadaot ug kalisod nga nasinati sa dakbayan panahon sa miaging mga katalagman, ilabina sa pag-igo sa Bagyong Tino, diin daghang lugar ang naapektuhan sa pagbaha ug pag-awas sa tubig gikan sa kabukiran.
Usa sa mga lugar nga nahimong basihan sa mayor sa pagpalambo sa disaster preparedness sa dakbayan mao ang Barangay Bacayan, Cebu City, nga grabeng naapektuhan sa kusog nga pag-agos sa tubig gikan sa kabukiran atol sa maong bagyo.
Nahinumdoman nga ang kusog nga ulan nga dala sa Bagyong Tino hinungdan sa pagdagan sa daghang tubig gikan sa kabukiran ngadto sa ubos nga mga komunidad, nga nagpahinabo sa pagbaha ug kadaot sa mga kabtangan, ingon man peligro sa kinabuhi sa mga residente.
Tungod niini, gibutyag ni Archival nga nakigtambayayong na ang Cebu City government sa dakbayan sa Mandaue ug munisipalidad sa Liloan alang sa pagbutang og mga sensing device nga magsubay sa lebel ug gidaghanon sa tubig nga gikan sa kabukiran ug posibleng moagas ngadto sa mga komunidad sa siyudad.
Tumong niini nga makahatag og mas sayong pasidaan ngadto sa mga residente aron malikayan ang pagbalik sa susamang kadaot nga nasinati atol sa Bagyong Tino.
Lakip usab sa mga prayoridad sa mayor ang pagpalambo sa mga evacuation center sa dakbayan, diin dili lamang mga biktima sa bagyo ug linog ang makapahimulos niini, kondili apil usab ang mga pamilyang maapektuhan sa sunog ug uban pang matang sa katalagman.
Matud pa ni Archival, nangita ang city government og mas dagkong luna nga mahimong permanenteng evacuation center aron malikayan nga ang mga eskwelahan kanunayng gamiton isip temporaryong kapuy-an sa mga bakwit, nga posibleng makaapekto sa padayon nga pagpatuman sa klase.
Gawas niini, giawhag usab sa mayor ang mga pamilyang nagpuyo duol sa mga suba, sapa ug kabaybayonan nga dili na maghulat nga moigo ang bagyo o mosaka ang tubig sa dili pa mobakwit.
Gipasiugda niini nga mas maayong mosunod dayon sa mga pahimangno ug abiso sa gobyerno ug mobakwit sa sayong panahon aron malikayan ang peligro sa kinabuhi.
Sa katapusan, giawhag ni Archival ang mga Sugboanon nga ipadayon ang ilang espiritu sa kalig-on ug panaghiusa panahon sa mga katalagman, samtang gipasalig nga magpadayon ang city government sa paghatag og tabang ug pagpanalipod sa katawhan.
Usa ka tuig human sa hagit nga gidala sa Bagyong Tino, gipasiugda sa lokal nga panggamhanan nga ang matag katalagman kinahanglan mahimong leksyon aron mas maandam ang siyudad ug mas mapanalipdan ang kinabuhi sa mga Sugboanon.
