TALISAY CITY, CEBU- Gipasiugda ni Talisay City Mayor Gerald Anthony “Samsam” Gullas ang pagpalig-on sa disaster preparedness, emergency response ug seguridad sa siyudad atol sa iyang ika-8 nga State of the City Address (SOCA) gahapon Huwebes, Oktubre 8, 2026.
Gihatagan og dakong pagtagad sa mayor ang mga lakang sa pagpangandam sa kalamidad human grabeng naapektuhan ang siyudad sa Bagyong Tino niadtong Nobyembre 4, 2025.
Ang maong bagyo nakaguba sa gatosan ka panimalay ug mikalas sa pito ka kinabuhi.
Isip kabahin sa pagpauswag sa disaster preparedness, gipalig-on sa lokal nga kagamhanan ang pagbantay sa mga suba aron masubay ang pagsaka sa lebel sa tubig ug makahatag og sayong pasidaan sa mga residente.
Lakip sa mga planong ipatuman ang pagbutang og water monitoring system sa Mananga River ug CCTV aron mas mapauswag ang pagmonitor sa kahimtang sa suba.
Samtang, giila ni Gullas ang mga hagit ug limitasyon sa iyang administrasyon sa paghatag og tabang sa mga pamilyang naapektuhan sa Bagyong Tino.
Matud sa mayor, bisan pa sa mga kalisdanan, magpadayon ang lokal nga kagamhanan sa pagpauswag sa mga serbisyo ug pagpanalipod sa kaluwasan sa mga lumulupyo.
Gipalig-on usab sa siyudad ang mga programa sa mga eskwelahan bahin sa pagpangandam ug hustong pagtubag sa mga hulga sa pagpamusil ug pagpamomba.
Kini human makadawat ang Talisay City og tulo ka school threats ug duha ka bomb threats niining tuiga, nga miresulta sa pagkanselar sa mga klase ug pagsuspenso sa trabaho sa City Hall.
