Pabutangan sa kagamhanan sa Dakbayan sa Sugbo, ang mga tunghaan sa siyudad ug mga Emergency Hotlines, kini aron mas mapadali ang pagtawag sa mga magtutudlo, tinun-an ug lakip na ang mga ginikanan sa pagpakitabang sa mga emergency responders sa siyudad kung adunay mo tumaw nga bisan unsang matang nga hulga.
Kini human mibisita si Mayor Nestor Archival, uban si City Councilor Dave Tumulak, sa Ramon Duterte National High School ug Lahug Elementary School niadtong Agosto 25, 2026, alang sa pagbutang sa mga emergency hotline numbers sulod sa tunghaan.
Matud ni Konsehal Dave Tumulak, nga nakig-alayon na usab siya sa pamunoan sa Cebu City Police Office, aron sa pagpabutang og mga sakop sa mga kapulisan sa mga nagkadaiyang tunghaan sa dakbayan aron sa pagpahupay sa kabalaka sa mga ginikanan maylabot sa mga hulga sa tunghaan.
Gihangyo usab sa opisyal ang mga Barangay officials nga moabag sa pagpabantay ingun man pagpalig-on sa presensya sa mga Barangay Tanods aron malikayan ang susamang mga kaso sa pagdala ug hinagiban sa mga bata sulod sa tunghaan.
Gidasig usab ni Tumulak ang mga ginikanan nga kamustahon ang ilang mga anak, hilabi na ang estado niini sa pag-eskwela aron masayod sa mga panghitabo ug kasinatian sa mga bata.
Samtang sa pikas bahin, giawhag ang mga estudyante, ginikanan, magtutudlo, ug school personnel nga i-save sa ilang cellphone ang mga hotline numbers aron dali silang makapangayo og tabang kung adunay emerhensiya.
