Nibawi silang Konsehal Harry Eran ug Nyza Archival sa ilang sugyot nga magtukod og publicly funded nga mga pickleball court sa South Road Properties (SRP) human nitungha ang mga pangutana kon ang maong dapit bahin ba sa joint venture agreement sa dakbayan ug sa usa ka pribadong developer.
Matod ni Eran, gibawi nila ang resolusyon sa regular nga session sa City Council niadtong Martes, Hunyo 23, aron malikayan ang legal ug administratibong komplikasyon alang kang Mayor Nestor Archival samtang gisusi pa sa mga opisyal ang tinuod nga tag-iya sa maong property.
Gipatin-aw ni Eran nga base sa impormasyon nga ilang nadawat, ang dapit nga giila sa sugyot, nga mao ang kanhi Sinulog venue sa City di Mare, posibleng nalakip sa joint venture agreement hinungdan nga dili basta-basta makatukod og proyekto ang dakbayan nga walay pagtugot sa joint venture committee.
Bisan pa man niini, gipasalig sa konsehal nga wala nagpasabut nga undangon na ang plano alang sa pagpatukod og public pickleball courts sa Sugbo.
Nakatakda nilang kaestoryahon ang mayor aron mangita og laing lote nga gipanag-iyahan sa siyudad nga haom alang sa maong sikat nga dula nga makatabang sa himsog nga estilo sa kinabuhi sa mga pamilyang Sugbuanon.
