CEBU CITY- Nipagawas og mando ang Office of the Ombudsman nga pagamultahan og katumbas sa usa ka bulan sa iyang batakang sweldo si Cebu City Mayor Nestor Archival tungod sa nakit-ang mga kakulangan ug pagpabaya sa pagdumala sa 2025 Colon Street Night Market.
Sa giisyu nga administratibong desisyon, nakit-ang sad-an si Archival sa “simple neglect of duty” o yano nga pagpabaya sa katungdanan subay sa reklamo nga gisang-at ni City Councilor Pastor “Jun” Alcover Jr.
Gibutyag sa Ombudsman nga walay gipagawas nga opisyal nga pagtugot o clearances gikan sa Department of Public Works and Highways (DPWH) alang sa pagpasira ug paggamit sa Colon Street, diin usa kini ka nasyonal nga karsada.
Gawas niini, gikondenar usab sa opisina ang retroactive issuance o ang pag-isyu sa mga business permit nga mas ulahi na kaysa aktuwal nga pag-abli sa merkado.
Nagsugod ang operasyon sa night market niadtong Agosto 30, 2025, apan Septiyembre 1 na nahatag ang unang opisyal nga permit.
Nalakip usab sa mga panukiduki ang giingong pagtugot sa dakbayan sa Participative Association of Sugbo Vendors Inc. (PASVI)—usa ka pribadong kapunungan—sa pagdumala sa merkado, pagkolekta og bayranan gikan sa mga stall, ug pagpadayon sa operasyon lapas sa gitugot nga oras.
Sa pikas bahin, gibasura sa Ombudsman ang susamang administratibong kaso nga giatubang nahauna batok kanila ni City Treasurer Emma Cañazares Villarete ug City Administrator Albert Tjioe Tan tungod sa kakuwang sa igong ebidensya.
