CEBU CITY – Gihatagan ni Cebu City Mayor Tomas Osmeña ang Cebu City Police Office (CCPO) og ultimatum aron sulbaron ang insidente sa pagpangrakrak sa panimalay sa mga kapitan sa Brgy. Sudlon 2 ug Brgy. Sinsin sulod sa 10 ka adlaw.
Kini human nga nakita sa mayor nga politically-motivated ang maong insidente.
Mipahimangno si Osmeña ngadto ni Cebu City Director Police Col. Royina Garma nga iyang hunongon ang paghatag og allowance sa mga pulis nga na-assign sa mga bukirang barangay kung dili masulbad ang maong insdente sa gitakda nga panahon.
Samtang gihulagway ni Osmeña si Garma nga usa ka “worst” nga police chief sa 3 ka dekada niya nga pagkapulitiko.
Misugyot usab ang mayor nga angayang ipaubos ang 2 ka mga mountain barangay sa Cebu City sa control sa Commission on Elections.
Nagkanayon si Police Col. Garma nga dili gayud dali-dalion ang imbestigasyon sa pagpangrakrak sa panimalay nilang Brgy. Sudlon 2 Kapitan Pricillo Abores ug Brgy. Sinsin Kapitan Aurelio Laspuña.
Dugang pa ni Garma nga dili gayud siya hudlat-hudlaton ni Osmeña tungod kay gasoline allocation lang ang ilang nadawat ug wala pa madawat sa iyang mga sakop ang giingong allowance.
Gitino sa Cebu City Police Director nga dili gyud sila i-pressure kung gusto nga makapahigayon og maayong imbestigasyon.
Hinuon, mitambag si Garma nga mas maayong makig-alayon ang mga kapitan sa kapulisan aron makakuha sila og lead sa imbestigasyon.
Samtang gihimakak usab ni Garma ang pasangil ni Mayor Osmeña isip “worst” nga city police director tungod kay igo lang niya nga gisilbihan ang katawhan sa dakbayan sa Sugbo ug misunod lang siya sa legal orders.
