Cebu City- Midangop sa Bombo Radyo Cebu ang pamilya sa 12 anyos nga dalagita nga boot untang logoson sa may lungsod sa Badian probinsya sa Sugbo.
Pagsaysay pa sa inahan sa biktima nga gisugo niini ang iyang anak alas 6 sa gabii niadtong Abril 12. Samtang naglakaw matud pa kini, kalit nga dunay mi-atang kaniya nga lalaking nagtaptap sa nawng ug dayong ingong ‘tulis’.
Tungod kay 20 pesos lang ang dala nga kwarta sa dalagita, gidala matud pa kini sa suspect sa kawayanan ug didto logoson. Basi sa pamahayag sa biktima, gihubu-an siya sa suspek ug sa dihang padung na kini matud pa mutanday kaniya, wala kini makadayon sa pagpahimos sa biktima diha-diha dayon tungod kay wala mibarog ang kinatawo niini.
Hinungdan nga nakadagan ang biktima nga wala nay sapot sa ubos nga bahin sa iyang lawas ug nangayo kini og pakitabang sa mga silingan.
Positibo nga gitudlo sa biktima ang suspek sa dihang misumbong kini sa kapulisan apan wala matud pa dayon sikopa niini ang suspect butang nga gikwestyon usab sa inahan sa biktima.
Pagtino ni Police Senior Master Sergeant Josefina Beriarmente sa Women’s Desk sa Badian PNP nga daw samang dili consistent ang statement sa biktima hinungdan nga gibuhi-an nila ang suspek.
Hustisya ang siyagit karon sa inahan sa 12 anyos mao nga nangayo kini og tabang sa Bombo Radyo ilabina nga ang iyang anak na trauma og dili kini makatulog og tarong matag gabii.
Samtang padayong giimbestigaran karon sa Badian PNP ang naasoy nga panghitabo.
